Fyrst var ekið sem leið lá um Öxnadalinn og gert stutt stopp á bílastæði  gegnt Hrauni , birtan var góð og gráupplagt til myndatöku. Svo var ekið í Skagafjörðinn og stefnan tekin á söguslóðir  þar tók á móti hópnum Sigurður Hansen á Haugsnesi og leiddi Kvisti í Kakalaskála og þar var smábúð með allskyns leirtaui, borðsilfri,  dúkum,  prjónaskap og lömpum. Einhverjir fjárfestu í jólagjöfum, svo var hlýtt á fyrirlestur áður en farið var út á vígvöllinn þar Sigurður er búinn að raða upp stórgrýti  í fylkingar  og hefur persónugert grjótið.  Því næst var haldið að áningarstaðnum hjá styttu Jóns Ósmanns og þar sem nest var snætt í fínu veðri.  Þá var haldið til Sauðárkróks og Bjössi Mikk. leitaður uppi og bauð hann inn í snyrtilegt safn og kaffistofu, en þar gaf að líta ýmis rarítet m.a. skilti úr umferðinni. Að skoðun lokinni steig Bjössi um borð í rútuna og var ekið um bæinn undir hans leiðsögn og fórum með houm upp í Geitamel en þar er hann með hross og hænsn. Var Bjössi síðan kvaddur og brunað var í átt að Hraunum í Fljótum. Þar er Björk sem búsett er á Akureyri með starfsaðstöðu í fyrrum húsnæði Miklalax  og útskýrði leyndardóma dúntekju og vinnslu og síðan úrvinnsluna. Þarna gafst tækifæri á viðskiptum og fjárfestu nokkrar í jólagjöfum. Var nú orðið áliðið og spýtt í og ekið til Siglufjarðar, stundum þurfti nú bara að fara fetið vegna nýafstaðinna náttúruhamfara. Glorhungraðir Kvistir settust síðan að borðum í hinu nýja hóteli og nutu  matarins áður en haldið var heim til Akureyrar. Það voru fjórtán Kvistir og áhangendur sem tóku þátt í þessari för. (GS)