Norsku skátabandalögin létu útbúa „orðaský“ sem sýnir helstu gildin sem norsku skátunum þykja mikilvægust í skátastarfinu. Orðin sem eru mest áberandi í skýinu eru VINÁTTA, FÉLAGSSKAPUR, SAMVINNA OG VIRÐING ennorskum skátum þykja þessi orð lýsa mikilvægustu þáttunum fyrir utan náttúruna og útiveruna.

Það eru einmitt þessi orð, VINÁTTA, FÉLAGSKAPUR, SAMVINNA OG VIRÐING sem lýsa best því sem við teljum mikilvægast í starfi skátagildanna okkar og það eru þeir þættir sem gildin byggja starfsemi sína á. Þegar við hittumst árlega til að halda upp á Vináttudaginn, þá er það einmitt til að minna okkur á hversu mikilvæg þessi gildi eru fyrir okkur öll.

Það er ekki skrýtið að það sem er mikilvægt fyrir skátana sé einnig mikilvægt fyrir okkur hina eldri. Flest okkar eiga sér fortíð innan skátahreyfingarinnar þar sem við upplifðum gildi félagskaparins og ánægjuna sem felst í að vinna saman.  Þegar við vorum skátar fengum við ýmis verkefni og ábyrgð sem stuðlaði að þroska okkar, bæði sem einstaklingar og sem samtaka félagar í hópi. Það sem meira er þá varð félagskapurinn til þess að við fengum einnig tækifæri til að hafa góð áhrif á þroska skátafélaga okkar. 

Það voru einmitt svona stundir og reynsla sem varð til þess að við vildum gerast félagar í skátagildi. Það má þó alls ekki gleymast að félagskapurinn okkar býður líka velkomið fólk sem hefur ekki verið skátar og það er gott fyrir gildin okkar að fá nýtt sjónarhorn og hugmyndir.

Mikilvægt er að muna að sambandið á milli skátanna og skátagildanna er gagnkvæmt samstarf, samstarf sem er til góðs fyrir báða aðila eins og kemur svo vel fram í kjörorðum norska skátagildisins: „Saman styrkjum við skátastarfið“. Margir gildisskátar hjálpa til á skátamótum og annarsstaðar þar sem skátar koma saman, bæði í skátafélögum og á landsvísu. Sum skátagildi halda viðburði sem þau bjóða skátahópum að taka þátt í til að kynnast skátunum og viðhalda góðu sambandi við þá. Á undanförnum árum hafa skátagildin í Noregi verið með sérstakt átak til að auka samvinnuna við norska skáta, bæði hreyfinguna sem slíka og skátafélögin. Árangurinn af átakinu er enn betri samvinna við skátana, en það eru jú einmitt þeir sem eru gildisskátar framtíðarinnar.

Þessi samvinna er mikilvægur þáttur í því að fá nýja og yngri gildisskáta en það er nauðsynlegt til að tryggja að skátagildin haldi áfram að starfa í framtíðinni. Til að ná árangri er mikilvægt að taka hlýlega á móti nýjum félögum og gefa þeim verkefni með okkur. Nýir félagar koma með nýja hugsun og nýjar hugmyndir sem við skulum taka fagnandi og reyna að láta þeim finnast þeir vera velkomnir. Ef okkur tekst þetta þá getum við látið okkur hlakka til að fagna Vináttudögum í framtíðinni með nýjum vinum og stofnað til enn fleiri varanlegra vináttubanda.

Við skulum líka muna að Vináttudagurinn er haldinn hátíðlegur um allan heim sem stofndagur ISGF eða alþjóðlegu samtök skátagilda, en það sýnir einmitt þessa mikilvægu, alþjóðlegu hlið skátagildanna. Samvinna og vinátta sem nær yfir alþjóðleg landamæri færir okkur nýja vini og dýrmætar nýjar hugmyndir frá löndum sem eru ólík okkar eigin. Þegar við hittum nýja vini frá öðrum löndum áttum við okkur fljótlega á því að við höfum sömu grunn gildi í lífinu og það gefur okkur sameiginlega notalega tilfinningu vináttu og góðs félagsskapar.

Við viljum því nota þetta tækifæri til að senda okkar bestu framtíðaróskir til félaga í okkar eigin gildi, í öðrum skátagildum, til baltnesku gildisfélaganna okkar og gildisvina út um allan heim.

Fyrir hönd St. Georgsgildanna í Noregi,

Inger Merli                                           Knut Jorde                                           og Ivan Chetwynd